Ձեռներե՞ց, անհատ ձեռնարկատե՞ր․․․ Ու՞մ պատկերացրեցիք։
Ուժեղ մեկն է, ով իր ձեռքերի մեջ է պահում մի ամբողջ ընկերություն, ապահովում դրա առաջխաղաումն ու հետագա աճը։
Ինչպիսի՞ն է նման մարդը
- Հաստատակամ,
- Նպատակասլաց,
- Անընդհատ զարգացող,
- Նախաձեռնող:
Այսպիսին ենք հաճախ պատկերացնում ղեկավար պաշտոն զբաղեցնող բոլոր մարդկանց, սակայն մի քանի տասնամյակ առաջ այս ցանկին կավելանար նաև “տղամարդ” բառը, որպես բնորոշում։ Նշված հատկությունները հաճախ վերագրում են “ուժեղ սեռի” ներկայացուցիչներին, բայց չմոռանանք, որ կանայք ոչ պակաս մրցունակ են տվյալ հատկանիշներ ցուցաբերելիս։ Չէ՞ որ նրանք ավելի ճկուն են օգտագործում իրենց հմտությունները սեփական բիզնեսում հաջողելու համար։
Եվ եթե Դուք կարծում եք, որ հայ կանայք դեռ նոր են մուտք գործում բիզնես ոլորտ և այստեղ դեռ շատ ասելիք չունեն, ապա հաճելիորեն կզարմանաք` տեսնելով 4U.am-ի կին գործընկերներին։
Ծանոթանանք նրանցից մի քանիսի հետ և բացահայտենք հաջողված բիզնես հիմնելու նրանց գաղտնիքները։ ժամանակը գնում է․ արդյո՞ք դեռ արդիական են կանանց շուրջ պտտվող այդքան հայտնի կարծրատիպերը։
Կնոջ տեղը․․․ խոհանոցու՞մ
Հայտնի կարծիք կա, չէ՞, կնոջ գտնվելու վայրի հետ կապված։ Դե այո, շատ կանանց մոտ լավ է ստացվում խոհանոցում համեղություններ պատրաստել, սակայն հաճախ այդ նույն կանանց չի տրվում հնարավորություն ցույց տալու այլ տաղանդներ․ ժամանակ չի մնում։
Կանայք ամենատարբեր հանգամանքներում են սկսում սեփական բիզնեսով զբաղվել, սակայն գերակշռում է ռեստորանանային բիզնեսը։ Ի՞նչ եք կարծում, ինչու՞ է այդպես։ Ձեռնարկատերը պետք է բավականին տեղեկացված լինի իր ընկերության գործունեության ոլորտից, որպեսզի ձախողվելու հավանականությունը նվազագույն լինի։ Դե իսկ մեր գործընկերները ցույց կտան, որ շատ լավ կարողանում են նաև “ղեկավարել խոհանոցը”։
LipLick Cakes
“Լիփ Լիք” նշանակում է համից շուրթերը լիզել։ Տորթերի արտադրության ընկերության հիմնադրի՝ Լիլյայի ոգեշնչման աղբյուրն իր բալիկն էր։ Հաճախ մայրիկները նորածին փոքրիկի ծնունդը նշում են ամեն ամիս՝ մինչև մեկ տարեկանը լրանա։ Լիլյան ևս, երբ որդին ծնվեց 2011 թվականին, ամեն ամիս սկսեց տորթեր պատրաստել։ Հետզհետե մասնագիտանացավ, և եկավ սեփական բիզնեսը հիմնելու ժամանակը։
Սակայն բիզնես վարելու համար բազմակողմանի մոտեցում է հարկավոր․ բավական չէ միայն իդեալական կատարել սեփական գործը։ Հարկավոր է տարբեր մասնագետների ջիղեր ունենալ, օրինակ՝ իրավաբանի կամ հաշվապահի, որպեսզի բոլոր գործառույթները պարզ լինեն։
Լիլյան մասնագիտությամբ իրավագետ է։ Եվ չնայած, երկրորդ մասնագիտացումը լիովին հակասում է առաջինին, նա միայն ուրախ է այդ առիթով, քանի որ այստեղ ազատ է ստեղծագործել, գործի դնելով իր ողջ երևակայությունը։
“Էքստրիմի սիրահար եմ, ինչից վախ ունեմ, միշտ փորձում եմ հաղթահարել”
Saryan’eats
Սեզոնային լուծումներով այլընտրանքային սննդի մատակարար Սարյանից ընկերության հիմնադիրը Նարինեն է։ Հյուրընկալության ոլորտի իր մեծ փորձը սննդի ոլորտում միայն օգնել է․ ընկերությունն առաջարկում է սնունդ այնպիսի մատուցմամբ, որ հաճելի լինի այն նաև նվիրել։ Օրինակ՝ բրաունիի բաղադրինչները գեղեցիկ ապակյա տարայի մեջ, վրան գրված բաղադրատոմսով։
Նարինեն շեշտում է, որ իրենք նորեկ են բիզնեսում։ Պատերազմի սկսվելու պատճառով նախատեսածից ուշ են մտել շուկա, սակայն երբեք չեն հուսահատվել։ Չէ՞ որ ընկերության նպատակն է եղել փոխանցել էմոցիաներ, այլ ոչ թե պարզապես սնունդ մատուցել։ Կորոնավիրուսային համավարակն այդ առումով իր դրական ազդեցությունն ունեցավ․ իր հիմնական աշխատանքից դուրս այլ գործի համար ժամանակ հայտնվեց։
“Գլխավոր ձեռքբերումը ժամանակի սղությունից չնեղվելն էր: Դա էլ նպաստեց մեկնարկել նոր նախաձեռնություն: Այժմ նպատակներն առաջ մղելու ժամանակն է“
Արցախի համը
Ուժեղ կանայք ունեն մի ընդհանուր հատկություն՝ ճգնաժամային իրավիճակներում իրենց ձեռքն են վերցնում իրավիճակն ու գործում ըստ պահի թելադրած անհրաժեշտության, հարկ եղած դեպքում անձամբ ռեսուրսներ հայթայթելով։
Նույն կերպ սկսվեց նաև “Արցախի համը” սոցիալական նախաձեռնությունը։ Հիմնադիրը՝ Նելլին, պատերազմի պատճառով տեղահանված հադրութցի կանանց աշխատանքով ապահովելու համար էր այն սկսել։ Արցախցի մեր հայրենակիցները պատրաստում էին պահածոներ, Նելլին օգնում էր իրացնել դրանք։
Արդյունքում, կանայք ունեցան աշխատանք, որպեսզի կարողանան լուծել հասարակ կենցաղային խնդիրներ։ Այժմ արդեն 12 կին ունի աշխատանք և ապահովում է իր ընտանիքի օրվա հացը։
Կեռաս
Կրթել սերունդներ, որոնք կներկայացնեն երկիրը և անցնել սեփական բիզնեսնին, որի նպատակը ևս պատշաճ և յուրահատուկ ձևով հայկական մշակույթը ներկայացնելն է։ Սա է Վիկտորիայի՝ “Կեռաս” ընկերության հիմնադրի նպատակը։
Նա նախքան ընկերությունը հիմնելը գլխավորել է պետական դպրոց։ Ինչն իր դերն է ունեցել սեփական բիզնեսը ղեկավարելիս։ “Կեռասը” ներկայացնում է մեր կուլտուրան՝ այն օրիգինալ փաթեթավորմամբ չրերի արտադրություն է։ Ստեղծվել է 2018 թվականին։ Շնորհիվ փաթեթավորման, տեսականին հարմար է նաև նվիրել և ուղարկել արտերկիր, ինչն օգնում է ներկայացնել հայկականն արտասահմանում։
“Ցանկանում ենք նորովի ներկայացնել ընտանեկան չորանոցում չորացված հայկական մրգերը“
Ամենատարբեր ոլորտներում մասնագիտացած կանայք կարողանում են իրենց նախկին մասնագիտական փորձը ներդնել նոր հիմնած կազմակերպության առաջխաղացման մեջ։
Հարկավոր է բավականաչափ ուժ, գիտելիք և ճկունություն ցուցաբերել․ կանանցից շատերի գործունեության ոլորտները բավականին տարբեր են։ Եվ չնայած նրան, որ նրանք օրեցօր ապացուցում են, որ 21-րդ դարում արդեն գրեթե չկա այնպիսի զբաղմունք, որը հարիր է միայն տղամարդուն, միևնույն է, դեռ կան կարծրատիպեր, կապված կնոջ զբաղմունքների հետ։
