Ինչո՞վ պետք է զբաղվի կինը․
Կանայք և գնումները
Գովազդային արշավները հիմնականում հաշվարկվում են կանանց համար։ Ասում են՝ կանանց շրջանում ավելի շատ են հանդիպում շոփոհոլիկները, և նրանք ավելի հակված են էմոցիոնալ գնումներ կատարելուն։ Լինի դա միֆ, թե իրականություն՝ մեր կին գործընկերները ցույց են տալիս, որ հնարավոր է ղեկավարել խանութ, կարի արտադրամաս, կարել ու ներկրել որակյալ ապրանք։ Տեսնենք օրինակներով։
Bonasens.am
Bonasens-ն առցանց խանութ է, որի հիմնադիրը՝ Մաննիկն է, ինքնուրույն է կառավարում ամեն ինչ։ Այնտեղ ներկայացված են հետաքրքիր գրենական պիտույքներ, դպրոցական պարագաներ, որոնք սիրով օգտագործում են նաև մեծերը։ Մաննիկը շեշտում է, որ բիզնեսի հաջող ընթացքի մեջ ընտանիքի բոլոր անդամներն ունեն իրենց ներդրումը․ նրանք զբաղվում են սոց․ ցանցերում առաջխաղացմամբ, ապրանքների ընտրությամբ, պահեստի կառավարմամբ։ Վերջինի պատասխանատուն Մաննիկի յոթամյա դուստրն է։ Դե ասեք, որ ընտանիքի անդամների հետ աշխատել չի կարելի։
Պանդեմիայից հետո հատկապես օնլայն խանութները մեծ պահանջարկ սկսեցեին վայելել և, որպես հետևանք, շատացան։ Սակայն ոլորտում աճող մրցակցությունից ընկերությունը չի վախենում, քանի որ, ըստ Մաննիկի՝
Մենք մրցակիցներին ավելի շատ ընկալում ենք, որպես գործընկերներ, ավելին՝ շատերի հետ համագործակցում ենք։ Մրցակցության աճը նոր ու հետաքրքիր գաղափարների շունչ է տալիս։
Կար ու ձև
Որքան հաճախ էինք նախկինում բոլորս օգտագործում “մայրիկս (տատիկս) է կարել” արտահայտությունը, այնքան այն գնալով ավելի ու ավելի է զարմանք ու հիացմունք առաջացնում։ Էլ չասենք “Ինքս եմ կարել”-ի մասին։ Վերջինս այնքան հազվադեպ է պատահում մեր իրականության մեջ։ Այնուամենայնիվ, որքան էլ տեխնոլոգիապես զարգացած դարաշրջանում ապրենք, միևնույն է, ձեռքի շնորհքը գնահատվել ու գնահատվում է հանրության կողմից։
Եվ այստեղ էլ մեր կին գործընկերները ցույց են տվել, որ հնարավոր է կարծրատիպեր կոտրել։
Artuyt
Արտույտի հիմնադիրն Արևիկն է, նրա համար առաջնային նպատակ է եղել ճանաչելի դարձնել հայկական արվեստը և՛ Հայաստանում, և՛ Հայաստանից դուրս։ Ընկերությունը զբաղվում է շարֆերի և աքսեսուարների արտադրությաբ։ Համագործակում է տարբեր թանգարանների հետ, որոնցից են Երևանի ժամանակակից արվեստի թանգարանը, Սերգեյ Փարաջանովի թանգարանը, Սուրբ Էջմիածնի թանգարանները, Երվանդ Քոչարի թանգարանը, Մատենադարանը։ Բոլոր աքսեսուարների վրա կարող եք տեսնել արվեստի հայտնի գործերը։ Իսկ քանի որ շարֆերը կրում են այնպիսի հայտնի մարդիկ, ինչպիսիք են Անգելա Մերկելն ու Քիմ Քարդաշյանը, Արտույտի արվեստն, իրոք, ճանաչելի է դառնում ամբողջ աշխարհում։
Մանկուց երազել եմ միաձուլել արվեստը նորաձևության հետ։ Նաև բազում ճանապարհորդություններից հետո հասկացա, որ շատ կարևոր է մատչելի ներկայացնել հայկական արվեստը։ Այդպես որոշեցի ստեղծել շարֆերը։
Աքսեսուարներից անցնենք հագուստին։ Մանկական, թե մեծահասակների՝ հագուստը վաղուց արդեն դարձել է ինքնաարտահայտման միջոց։ Եվ, չնայած որ, կանանց են վերագրում հագուստի վրա անտեղի գումար վատնելու սովորությունը, այսօր արդեն նրանք նաև գումար են աշխատում այդ ոլորտում։
Lalunz
Lalunz-ը մասնավորապես մանկական հագուստի արտադրությամբ է զբաղվում։ Հիմնադիրը Լուսինեն է։ Անվանումը գալիս է Սյունիքի մարզից, քանի որ բրենդը ստեղծելիս ոգեշնչման աղբյուր են եղել Սյունիքի հնագույն ժայռապատկերները, արված 7500 տարի առաջ։ Լուսինեն այլևս չի պատկերացնում իր կյանքն առանց բրենդի, որը դարձել է իր երեխան։ Ըստ իրեն՝ շատ ու շատ խոչընդոտների է բախվել այս տարիների ընթացքում, բայց կարևոր մի բան կա՝
Եթե որևէ բան անում ես սիրով, ոչ մի խոչնդոտ չի կարող խանգարել հասնել վերջնական արդյունքին։
Իսկ Lalunz-ի առջև դրված նպատակն է՝ ապացուցել, որ հայկականը ոչնչով չի զիջում արտասահմանյանին և հնարավոր է ճանաչելի դարձնել Հայաստանը նաև նորաձևության ոլորտում։
